Handknattleiksdeild
Slæmur skellur á Akureyri
Handboti - Mfl. karla
Gróttumenn flugu norður í land í dag til þess að spila annan leik ársins. Ljóst var að leikurinn yrði gríðarlega erfiður í Höllinni á Akureyri þar sem stuðningurinn hefur verið með eindæmum í vetur. Bæði lið höfðu tapað síðustu leikjum sínum og Akureyri nokkuð illa í Kaplakrikanum.
Skemmst er frá því að segja að Akureyri tók strax örugga forystu sem jókst er á leikinn leið. Lokatölur leiksins urðu 33 - 19 fyrir heimamenn. Markahæstir okkar manna voru Anton Rúnars með 8 mörk og Hjalti Pálma með 5.
Finnur Ingi var ekki með í kvöld vegna meiðsla sem hann varð fyrir í leiknum gegn Val í síðustu viku. Þá var Heiðar ekki með vegna samkomulags þar um sem gert var við norðanmenn þegar hann gekk til liðs við Gróttu í síðastliðnum mánuði.
Engum þarf að dyljast að það munar um að hafa ekki fyrrgreinda leikmenn liðtæka þar sem nokkuð skortir á breidd liðsins. Hvað sem því líður er sá munur sem skildi liðin að í leikslok allt of mikill. Liðið sýndi á fimmtudaginn síðastliðinn mikinn andlegann styrk og karakter þegar það vann sig tvívegis inn í leikinn og var hársbreidd frá því að ná stigi eða tveimur út úr honum. Greinilegt er að verulega hefur vantað upp á það andlega þrek á Akureyri.
Á morgun hefst lokaundirbúningur fyrir undanúrslitaleikinn í Eimskipsbikarnum sem leikinn verður að Hlíðarenda næstkomandi sunnudag. Mikilvægt er að beina gremjunni með niðurstöðu norðurferðarinnar í uppbyggjandi farveg. Á sunnudaginn mun gefast gullið tækifæri til þess að reka af sér sliðruorðið og hefna fyrir tvö grátlega naum töp gegn Valsmönnum í vetur.
Upp með sokkana og út með kassann!!
ÁFRAM GRÓTTA !
