5.fl. karla eldra ár í 2.sæti í vetur

Handbolti - 5.fl. karla

10.5.2010

Helgina 30.apríl - 2.maí fór fram seinasta íslandsmótið í vetur hjá eldra árinu í 5.flokki karla. Mótið var haldið af FH-ingum og bar mótið heitið Silver-mótið. Grótta teflir fram þremur liðum í þessum árgangi, Grótta 1 lék í efstu deild, Grótta 2 í annarri deild og Grótta 3 í 4.deild. Segja má að uppskeran hafi verið góð að þessari helgi lokinni.

Grótta 1 var í baráttu við FH um íslandsmeistaratitilinn en fyrir mótið hafði Grótta unnið tvö mót í vetur og FH tvö. Innbyrðisleikur þessara tveggja liða á mótinu var úrslitaleikur en því miður tapaðist sá leikur ósanngjarnt 14-10. Aðrir leikir unnust örugglega og því var silfrið niðurstaðan. Engu að síður frábær árangur í vetur. Liðið endaði með 26 stig, 10 stigum á undan næsta liði sem lenti í 3.sæti og eingöngu fjórum stigum á eftir FH-ingum.

Grótta 2 lék í 2.deildinni og voru tvö forföll í því liði. Aðrir leikmenn liðsins þurftu því að stíga upp á leika ábyrgðafyllri hlutverk en áður. Þeir stóðu svo sannarlega undir því. Liðið endaði í 5.sæti deildarinnar en liðið stóð heldur betur í A-liðum annarra félaga. Liðið endaði í 2.sæti allra B-liða í vetur.

Grótta 3 lék í 4.deildinni. Liðið lék vel um helgina og unnu alla leikina nema einn. Með þeim úrslitum endaði liðið í 2.sæti deildarinnar. Samanlagt endaði liðið í 2.sæti allra C-liða í vetur.

Segja má að árangur 5.flokks karla eldri hafi verið glæsilegur í vetur. Vitanlega voru margir leikir erfiðir þar sem Grótta 2 og Grótta 3 léku oft gegn A-liðum annarra félaga. Þeir leikir kenndu okkar strákum heilmikið en framfarirnar í vetur voru mjög miklar.

Til baka, Senda grein, Prenta greinina