FH - Grótta: 23 - 27

Handbolti - Mfl. kvenna

3.11.2009

Meistaraflokkur kvenna lék annan leik sinn á Íslandsmóti kvenna á sunnudag. Leikið var gegn FH í Kaplakrika en stúlkurnar voru staðráðnar í að fylgja eftir góðum sigurleik gegn sameinuðu liði Fjölnis/Aftureldingar fyrir viku. Í lið Gróttu vantaði nokkra öfluga leikmenn en Ásrún Lilja Birgisdóttir var veik og markverðirnir Sóley Halldórsdóttir og Rannveig Smáradóttir áttu ekki heimangengt í þennan leik.

Gróttustúlkur byrjuðu af miklum krafti og komust í 5-1 í upphafi leiks en þá tóku heimastúlkur við sér og staðan var jöfn fram eftir fyrri hálfleik. Undir lok hálfleiksins náði Grótta tveggja marka forystu

11-13 en það var einmitt staðan í hálfleik.

Það var allt annað lið sem kom til leiks í síðari hálfleik og skoruðu Gróttustúlkur hvert markið á fætur öðru á upphafsmínútum hálfleiksins og lögðu grunninn að sigrinum. Á tímabili munaði átta mörkum á liðunum en öflugt lið FH gafst ekki upp og minnkaði muninn.

Þær komust þó aldrei mjög nálægt gestunum af Nesinu sem uppskáru fjögurra marka sigur, 23-27.

Leikurinn var nokkuð kaflaskiptur hjá Gróttu. Inn á milli mjög góðra leikkafla komu slakir kaflar sem urðu þess valdandi að sigurinn var ekki stærri. Þó má ekki taka það af heimamönnum í FH að þær eru með öflugt lið og góða blöndu yngri og eldri leikmanna. Hjá Gróttu átti markvörðurinn Hlíf Reynisdóttir frábæran leik og varði hvert skotið á fætur öðru, sérstaklega í síðari hálfleik á þeim kafla sem FH minnkaði muninn. Tinna Laxdal Gautadóttir átti einnig góðan leik og skoraði sjö mörk auk þess sem Hildur Marín Andrésdóttir óx ásmegin eftir því sem líða tók á síðari hálfleik.

Næsti leikur Gróttustúlkna er gegn Haukum á Seltjarnarnesi nk. laugardag kl. 14.00. Fréttaritari hvetur alla til að mæta á völlinn og sjá framtíðarleikmenn meistaraflokks kvenna hjá félaginu.

Mörk Gróttu:

-Tinna Gautadóttir 7
-Bjarney Bjarnadóttir 7
-Hildur Marín Andrésdóttir 4
-Katrín Tómasdóttir 3
-Sandra Halldórsdóttir 3
-Sigríður Svala Jónasdóttir 2
-Dagmar Magnadóttir 1
-Agnes Guðmundsdóttir 1

Hlíf Reynisdóttir varði 18 bolta í markinu

Til baka, Senda grein, Prenta greinina