Meistaraflokkur kvenna hóf undirbúning sinn fyrir komandi keppnistímabil í byrjun síðustu viku. Stelpurnar æfa 5-7 sinnum í viku og mun þetta æfingatímabil standa fram til lok júní eða í sjö vikur. Þegar þessu tímabili lýkur munu leikmenn sjá um sig sjálfar í fjórar vikur en æfingar hefjast svo aftur í byrjun ágúst. Liðið stefnir á að fara í æfingaferð til Sönderjyske í Danmörku í endann ágúst en Ágúst Jóhannsson, fráfarandi þjálfari karlaliðs Gróttu, er þjálfari danska liðsins. Leiknir verða tveir æfingaleikir og æft við bestu mögulegu aðstæður í ferðinni.
Eins og áður hefur komið fram á heimasíðu Gróttu þá æfir kvennaliðið af kappi þessa dagana undir stjórn Kára Garðarssonar. Í lok síðustu viku var gengið frá ráðningu Guðmundar Árna Sigfússonar sem aðstoðarþjálfara liðsins til næstu tveggja ára. Guðmundur var einnig aðstoðarþjálfari liðsins í fyrra en þá endaði liðið í 7. sæti N1 deildarinnar.
Grótta hefur ráðið Didda sem aðstoðarþjálfara meistaraflokks karla og aðalþjálfara 2 fl. karla fyrir næsta tímabil. Diddi heldur því áfram með 2 flokkinn og tekur að sér aðstoðarþjálfarann hjá mfl. sem verður undir stjórn Gunnars Andréssonar.
