Fyrsta stigið í 1. deild sótt til Akureyrar

15.5.2010

Í gær fór fram leikur Gróttu og KA í annari umferð 1. deildarinnar en leikið var á Þórsvelli vegna lélegs ástands Akureyrarvallar. Gróttuliðið þurfti að leggja lykkju á leið sína þar sem öskuský hamlaði flugumferð í gær og var því lagt af stað með rútu í hádeginu. Skemmst er frá því að segja að leikurinn endaði 1-1 í miklum baráttuleik en Magnús Bernhard Gíslason skoraði mark okkar manna og jafnframt sitt fyrsta mark fyrir félagið.

Leikurinn hófst af mikilli hörku og greinilegt að bæði lið ætluðu að selja sig dýrt. Jafnræði var með liðinum í fyrri hálfleik, KA-menn voru meira með boltann á meðan Grótta átti mikið hættulegri færi. Bæði Magnús Gíslason og Sigurvin Ólafsson voru nálægt því að skora en inn vildi boltinn ekki og staðan því markalaus þegar flautað var til hálfleiks. Seinni hálfleikurinn var spilaður af mikilli hörku eins og sá fyrri og greinilegt að mark lá í loftinu. Fremstur í flokki KA-manna fór spilandi þjálfari þeirra, Dean Martin,  sem var mikið í boltanum en lét leikmenn Gróttu fara óhemju mikið í taugarnar á sér allan leikinn. Á 60. mínútu var Ólafur Páll Johnson nálægt því að koma okkur mönnum yfir en tilþrifamikill flugskalli hans fór rétt fram hjá markinu. Ólafur var þá nýkominn inná sem varamaður en bakvörðurinn Agnar Sigurjónsson þurfti að fara út af meiddur.

Á 70. mínútu dró til tíðinda þegar fyrsta mark leiksins var skorað en þar var að verki Haukur Hinriksson, varnarmaður KA, sem skoraði með skalla eftir hornspyrnu frá Dean Martin. Gróttuvörnin svaf þar á verðinum og leyfði Hauki að leika lausum hala sem þakkaði fyrir sig með góðum skalla. Okkar menn létu þó ekki deigan síga og eftir einungis tvær mínútur voru leikar jafnir á ný. Þá fékk Magnús Gíslason góða sendingu frá Sölva Davíðssyni, lék listilega á þrjá varnarmenn KA og vippaði boltanum loks yfir Sandor Matus í markinu. Einstaklega fallegt mark og mikilvægt að ná að jafna. Leikurinn var í járnum það sem eftir var, KA-menn voru meira með boltann án þess þó að skapa sér hættuleg færi og endaði leikurinn 1-1. Brugðið gat til beggja vona allan leikinn en völlurinn var rennandi blautur og þungur eftir því. 

Eins og áður sagði átti Magnús góðan leik í framlínunni en ekki má gleyma framlagi miðjumanna sem allir áttu góða spretti. Vörnin var líka þétt með Kristján Finnbogason á bak við sig en snemma í seinni hálfleik varði hann meistaralega skot leimanns KA. Fyrst og fremst var það þó góð liðsheild og mikill baráttuandi sem skilaði þessu stigi í hús - hin tvö stigin voru heldur ekki langt undan.

Ólafur Páll Johnson og Vignir Benediktsson léku í gær sína fyrstu leiki fyrir Gróttu og óskum við þeim til hamingju með það. Vignir er á láni frá Breiðablik en hann er aðeins búinn að vera í herbúðum liðsins í nokkra daga. Meiðsli og leikbönn hafa sett strik í reikning Gróttuvarnarinnar að undanförnu og því mikill styrkur að fá Vigni í liðið. Ólafur kom eins og kunnugt er frá Fjölni eftir síðasta tímabil og mikilvægt fyrir liðið að endurheimta hann úr meiðslum.

 

Lið Gróttu var þannig skipað í gær:

Kristján, Agnar (Ólafur Páll '52), Knútur, Vignir, Einar Bjarni, Bragi, Hafsteinn, Sigurvin, Pétur Már, Sölvi, Magnús B (Dan '85).

Ónotaðir varamenn: Kjartan, Ali og Viggó

 

Næsti leikur Gróttu er á þriðjudaginn þegar lið Hamars verður heimsótt á Grýluvöll í Hveragerði í 64-liða úrslitum VISA-bikarsins.

 

Myndir: Sævar Geir Sigurjónsson

Til baka, Senda grein, Prenta greinina