4. flokkur karla í stuði

A-lið:

Það sem af er sumri hefur A-liðið spilað sex leiki, unnið fimm og tapað einum. Eftir Haukaleikinn vannst 1-0 baráttusigur á Fylki þar sem Axel Fannar skoraði sigurmarkið af miklu harðfylgi undir lok leiksins. Næsti leikur var á móti ÍA en í Faxaflóamótinu höfðu Skagamenn hreinlega flengt Gróttustrákana.  Staðan var 1-1 í hálfleik en í þeim síðari setti Gróttuliði í fluggírinn og sigraði 7-1 þar sem mörg glæsileg mörk voru skoruð. Fjórði leikur sumarsins var á móti Þrótti en þar var staðan einnig jöfn í hálfleik, 2-2, eftir frekar slakan fyrri hálfleik hjá okkar mönnum. Seinni hálfleikurinn var mun betri, líklega einn sá besti sem liðið hefur spilað í sumar, og náðu strákarnir að bæta við tveimur mörkum og sigra 4-2. Í vikunni á eftir komu sterkir Keflvíkingar í heimsókn en fyrir tímabilið var þeim spáð titilbaráttu ásamt liði UBK. Gróttustrákarnir virtust ekki til í slaginn og lentu fljótlega undir og var staðan 2-0 í hálfleik. Óli markmaður varð fyrir meiðslum í þeim síðari og tók Bessi stöðu hans í markinu. Enduðu leikar 4-0 í leik þar sem Gróttuliðið hefði getað gert mikið betur. Á fimmtudag fóru strákarnir í heimsókn í Breiðholtið og léku við lið Leiknis. Grótta komst yfir snemma leiks eftir hornspyrnu og rétt fyrir hálfleik bætti Bjarni við öðru marki með skoti af 40 metra færi í annað skiptið í sumar. Fleiri mörk voru ekki skoruð í leiknum en þrátt fyrir sigurinn spilaði Gróttuliði langt undir getu og ekki af sama krafti og oft áður í sumar. Næsta miðvikudag er gríðarlega mikilvægur leikur við Stjörnuna sem er á svipuðu róli og Grótta - í baráttunni um efstu 3 sæti A-riðils.

 

B-lið:

 

B-liðið fór tiltölulega auðveldlega í gegnum fyrstu þrjá leiki sumarsins. Eftir Haukaleikinn voru Fylkismenn lagðir að velli 6-1 og því næst Skagamenn, 5-0. Strákarnir mættu sterkari andstæðingum á móti Þrótti í leik sem var í járnum allan tímann. Staðan var markalaust allt fram á síðustu mínútur þegar Þróttarar ná að skora tvö mörk. Rétt þar á undan voru Gróttustrákarnir nálægt því að skora og gríðarlega svekkjandi að ná ekki a.m.k. öðru stiginu í Laugardalnum. Næsti leikur á móti Keflavík var ennig erfiður en Suðurnesjamenn voru taplausir fyrir leikinn. Axel Ingi skoraði gott mark og kom Gróttu yfir snemma leiks eftir frábæra sendingu frá Fannari Frey. Í seinni hálfleik settu Keflvíkingur gríðarlega pressu á Gróttustrákana og í raun ótrúlegt að þeim hafi ekki tekist að jafna leikinn en bæði Jón Ivan og Stulli vörðu eins og berserkir og eins bjargaði Ari einu sinni á línu. Agnar náði þó að gulltryggja sigurinn með laglegu marki undir lokin og góður sigur því staðreynd. Líkt og A-liðið spiluðu strákarnir við Leikni á fimmtudag og var aldrei spurning hvar sigurinn myndi lenda. Toggi, Fannar og Axel skoruðu mörkin í 3-1 sigri sem hefði getað verið mikið mun stærri. Á miðvikudaginn á B-liðið hörkuleik við Stjörnumenn en Garðbæingar eru á svipuðu róli og okkar menn í deildinni.

 

C-lið:

 

Eins og áður sagði hóf C-liðið sumarið af krafti með 8-1 sigri á Fjölni3 í Gravarvoginum. Næsti leikur var við Fjölni1 þar sem Gróttustrákarnir glutruðu sigrinum niður á lokasekúntunum og töpuðu 4-3. Sterkt lið Þróttar tók okkar menn í kennslustund og sigraði 5-0 á Gróttuvellinum. Í fjórða leik sumarsins fóru strákarnir í heimsókn í Kópavoginn og léku við Breiðablik. Þetta var mikill baráttuleikur en Bergur kom okkar mönnum yfir snemma leiks. Blikarnir jöfnuðu stuttu síðar og var allt í járnum fram til loka leiksins þegar enginn annar en Einar Gylfi stakk sér inn fyrir Blikavörnina og skoraði sigurmarkið. Einar leikur sem markvörður en spilaði úti í leiknum með þessum fína árangri. Góður sigur á Fimleikafélagi Hafnarfjarðar fylgdi í vikunni á eftir en það var Bessi Gautur sem skoraði sigurmarkið í seinni hálfleik. Strákarnir fóru í heimsókn í Árbæinin og léku við Fylki og lauk þeim leik með stórmeistarajafntefli, 2-2, þar sem nafnarnir Björn Andri og Björn Sigurðsson skoruðu mörk okkar manna. Seinni umferð Íslandsmótins hófst svo á miðvikudaginn þegar Gróttuliðið spilaði aftur við hina ógnarsterku Þróttara. Sá leikur tapaðist líkt og sá fyrri en það jákvæða var að Grótta náði að skora í leiknum og var það fyrsta markið sem Þróttarar fá á sig í sumar.

 

 

Eins og sést á þessari umfjöllun hefur sumarið farið vel á stað hjá 4. flokki. Margir góðir sigrar hafa unnist, glæsileg mörk verið skoruð og margir strákanna að spila listilega vel í hverjum leiknum á fætur öðrum. Þrátt fyrir þessa velgengni er mikilvægt fyrir strákana að slaka ekki á heldur gefa í og halda áfram af sama krafti.

 

Í lok þessa mánaðar fer 4. flokkurinn á Norway Cup í Osló og sendir þar 3 lið til leiks.