Knattspyrnudeild
4. flokkur kvenna gerði gott mót á Rey Cup
Dagana 22-25 júlí fór Rey Cup fram í Laugardalnum en mótið er alþjóðlegt knattspyrnumót fyrir 13-16 ára krakka. Á annað þúsund leikmanna tóku þátt í ár en mótið var nú haldið i níunda sinn. Grótta átti sína fulltrúa á mótinu annað árið í röð en 4. flokkur kvenna sendi lið til leiks í keppni B-liða. Stelpurnar spiluðu sex leiki á mótinu, sigruðu tvo, gerðu eitt jafntefli og töpuðu þremur. Fjórir af þessum sex leikjum voru við A-lið annarra félaga. Orri Axelsson er þjálfari þessara efnilegu fótboltastúlkna og segir hann betur frá mótinu hér að neðan.
Á miðvikudeginum var mótið sett með mikilli skrúðgöngu og opnunarhátíð og þar voru okkar stelpur að sjálfsögðu mættar með bros á vör. Á fimmtudagsmorgun spiluðum við okkar fyrsta leik við lið Fjölnis og tapaðist sá leikur 1-0 í miklum baráttuleik. Tinna var ekki langt frá því að jafna metin undir lokin en inn vildi boltinn ekki og jafntefli niðurstaðan. Klara stóð vaktina í markinu og stóð sig frábærlega. Síðar um daginn spiluðu Gróttustelpurnar við lið Þórs frá Akureyri og var aldrei spurning hvar sigurinn myndi enda. Tinna gerði sér lítið fyrir í fyrri hálfleik og skoraði tvö frábær mörk og héldu Gróttustelpurnar forrystunni til enda og uppskáru góðan 2-0 sigur. Vörnin stóð vaktina af miklu öryggi í leiknum og í kjölfarið komu margar baneitraðar sóknir. Ásamt Tinnu var Andrea öflug á kantinum en eins áttu Arnrún og Jórunn góðan leik og börðust eins og ljón allan tímann. Um kvöldið var svo keppendum mótsins boðið í sundlaugarpartý í Laugardalslaug þar sem margt var um manninn og mikið fjör.
Á föstudeginum kláraðist riðlakeppnin með leikjum við Grindavík og Skallagrím. Leikurinn við Grindavík var í járnum lengst af en tapaðist að lokum 3-1. Mark Gróttu skoraði Lovísa Thompson en hún er á yngra ári í 5. flokk en lék með Gróttustelpunum á mótinu og stóð sig vel. Seinni leikur föstudagsins var við Skallagrím þar sem Grótta var betra liðið allan leikinn sem endaði með 1-1 jafntefli. Hrafnhildur skoraði mark Gróttu með þrumuskoti úr aukaspyrnu en Karen stóð sig afar vel í markinu í leiknum.
Þessi úrslit þýddu að stelpurnar myndu leika um 5-8 sæti á mótinu og á laugardeginum var leikið krossspil við ÍBV. Þar léku Gróttustelpurnar við hvern sinn fingur og unnu frábæran 2-0 sigur á Eyjastelpum. Lovísa og Birna Rún skoruðu mörkin en heilt yfir var liðið mjög jafnt og spilaði afar vel. Um kvöldið var svo haldið gríðarstórt Rey Cup-ball á Brodway þar sem stelpurnar létu að sjálfsögðu sjá sig og stigu lauflétt dansspor við aðra keppendur mótsins.
