Grótta gerði jafntefli við ÍBV

15.1.2012

Meistaraflokkur hefur hafið æfingar á ný eftir gott jólafrí og var fyrsti leikur ársins leikinn á Gróttuvelli síðasta fimmtudag. ÍBV kom þá í heimsókn, eða réttara sagt blandað lið ÍBV og KA en stór hluti þessara liða æfir í Reykjavík. Leikurinn var hin besta skemmtun og voru Gróttumenn hársbreitt frá því að leggja Pepsi-deildarliðið að velli.

Gróttumenn byrjuðu leikinn betur og strax á 9. mínútu var fyrsta mark kvöldsins skoraði. Þá skoraði Kristófer Þór Magnússon eftir sendingu Hafsteins Bjarnasonar en aðdragandi marksins var flottur hjá Gróttuliðinu. ÍBV sótti í sig veðrið og á 19. mínútu jöfnuðu þeir metin. Gunnar Már Guðmundsson, sem er nýgenginn til liðs við ÍBV frá FH, kom sér þá í gott færi í miðjum teignum og þrumaði knettinum í markið.

Um miðjan fyrri hálfleikinn var Jóhannes Hilmarsson felldur innan vítateigs Vestmannaeyinga og dómari leiksins, Guðrún Fema Ólafsdóttir, benti umsvifalaust á punktinn. Jói tók vítið sjálfur og skoraði með góðu skoti. Gróttumenn voru ekki hættir og rétt fyrir leikhlé skoraði Garðar Guðnason sannkallað gull af marki. Hann fékk þá boltann vinstra megin við vítateigin, lék á varnarmann ÍBV og klíndi boltanum í vinkilinn fjær. Gjörsamlega óverjandi.

Eyjamenn voru ekki á þeim buxunum að láta flengja sig í heimsókn sinni á Seltjarnarnesinu og mættir grimmir út í síðari hálfleikinn. Markahrókurinn kunni, Tryggvi Guðmundsson, skoraði beint úr aukaspyrnu eftir nokkrar mínútur og minnkaði muninn í 3-2. Seinni hálfleikurinn var opinn og skemmtilegur og fengu okkar menn ágæt tækifæri til að komast í 4-2. Jóhannes komst einn á móti markverði eftir laglegan sprett og þá fóru sóknarmenn Gróttu illa með stöðuna þrír á móti einum stuttu síðar.

ÍBV setti mikla pressu á Gróttu undir lokin og oft skall hurð nærri hælum. Eftir eina stórsókn Eyjamanna sluppu Gróttumenn í skyndisókn þar sem Björn Axel Guðjónsson var kominn einn í gegn en skot hans fór hárfínt fram hjá markinu. Það var svo á 91. mínútu að stórsókn gestanna bar árangur en þá tók Tryggvi Guðmundsson aukaspyrnu sem KA-maðurinn Gunnar Valur Gunnarsson skallaði í netið.

Svekkjandi fyrir okkar menn að ná ekki að halda út leiktímann og leggja úrvalsdeildarlið að velli. Frammistaða Gróttuliðsins var ljómandi góð í leiknum og greinilegt að menn voru að leggja sig alla fram fyrir málstaðinn. Jóhannes var ógnandi í framlínunni og þá kom Hrafn sterkur inn á miðjuna í síðari hálfleiknum.

Eins og áður sagði var þetta fyrsti æfingaleikur Gróttu á árinu en næstkomandi þriðjudag spilar liðið annan leik þegar Fylkismenn verða sóttir heim í Egilshöllina.

Lið Gróttu í leiknum:

Magnús Örn Helgason, Hrafn Jónsson, Bjarni Jakob Gunnarsson, Guðmundur Marteinn Hannesson, Grétar Ali Khan, Hafsteinn Bjarnason, Ásgeir Hallgrímsson, Garðar Guðnason, Kristinn Rúnar Sigurðsson, Kristófer Þór Magnússon, Jóhannes Hilmarsson

Inná í hálfleik komu: Bjarni Freyr Ingólfsson, Bjarki Már Ólafsson, Oddur Karl Heiðarsson, Sigurður Steinar Jónsson

Inná á 65. mínútu komu: Björn Axel Guðjónsson, Jóhann Páll Ástvaldsson, Róstant Máni Sigurðsson

Með ÍBV léku tveir markverðir sem eru þessa dagana á reynslu hjá Gróttu, þeir Jón Kolbeinn Guðjónsson og Stefán Hirst Friðriksson

Gaggi skoraði glæsilegt mark á fimmtudaginn. Verst það voru ekki svona margir að horfa!

Til baka, Senda grein, Prenta greinina