Grótta - Fram: 32 - 29

Handbolti - Mfl. karla

5.12.2009

Á fimmtudagskvöld mætti Grótta liði Fram N1-deildinni. Leikurinn fór fram á Nesinu fyrir framan 550 áhorfendur. Fyrir leikinn hafði Gróttuliðið unnið 3 leiki af seinustu 4 og ekkert annað á boðstólnum en að bæta þeim fjórða við. Leikurinn fór hægt af stað en fljótlega komst Gróttan í 5-1. Eftir því sem leið á hálfleikinn náði Framarar að minnka muninn og í hálfleik var jafnt, 15-15.

Gróttumenn skoruðu fyrsta markið í síðari hálfleik, 16-15, en Framarar svöruðu með tveimur mörkum og náðu forystunni. Á 37.mínútu leiksins braut Arnar Birkir Hálfdánarson, leikmaður Fram á Jóni Karli Björnsson; greip í fótinn á Jóni Karli þegar hann sveif inn úr horninu og uppskar að sjálfsögðu rautt spjald. Þetta stórhættulega brot ber heitið "júgóslavneska bragðið" og getur stórslasað mótherjann. Gróttumenn gengu á lagið, skoruðu þrjú mörk í röð og lögðu grunninn að ágætum sigri. Framarar sýndu reyndar ágætan karakter, gáfust aldrei upp og ungu leikmennirnir sýndu á köflum ágæt tilþrif, en þeir náðu þó aldrei að ógna forystu heimamanna og Grótta stóð að lokum uppi sem sigurvegari, 32-29.

Leikurinn var aldrei mikið fyrir augað en stigin tvö GRÍÐARLEGA mikilvæg í baráttunni. Nú er Gróttuliðið komið með 8 stig og situr í 5.sætinu áfram, stigi á eftir FH-ingum sem eru í 4.sætinu.

Næsti leikur liðsins er gegn Víkingum í 8-liða úrslitum Eimskipsbikarsins á mánudaginn. Leikurinn hefst kl. 19:30 og fer fram í Víkinni.

Staðan í N1-deildinni lítur svona út eftir leiki fimmtudagsins.

Til baka, Senda grein, Prenta greinina