HK - Grótta: 2 - 2

Knattspyrna - Mfl. karla

3.8.2010

14. umferð Íslandsmótsins fór fram í gærkvöldi þegar Grótta lék við lið Handknattleiksfélag Kópavogs á útivelli. Fyrir leikinn voru okkar menn í 10. sæti með 12 stig á meðan HK var í því 7. með 15. Leikurinn reyndist hin besta skemmtun og endaði með 2-2 jafntefli þar sem Gróttuliðið var sterkari aðilinn í leiknum og spilaði á köflum glimrandi knattspyrnu. Fréttaritari Gróttusport var á leiknum og fylgdist vel með gangi mála.

Það blés ekki byrlega fyrir okkar menn til að byrja með en eftir aðeins 8 mínútur skoruðu heimamenn í HK fyrsta markið. Þar var að verki gamli refurinn Jónas Grani Garðarsson sem skoraði úr opnu færi eftir mikið klafs í teig Gróttu. Strákarnir létu þetta ekki á sig fá heldur blésu til stórsóknar með þá Magnús Bernhard Gíslason og Sölva Davíðsson fremsta í flokki.

Á 27. mínútu náði Gróttuliðið að jafna metin og var það mark einkar glæsilegt. Pétur Már Harðarson átti þá góða sendingu inn fyrir vörn HK á bakvörðin Einar Bjarna Ómarsson sem umsvifalaust sendi boltann fyrir markið þar sem Dan Howell kom aðvífandi og skoraði örugglega. Eftir markið hélt stórsóknin áfram og hafði Grótta yfirburði á vellinum það sem eftir lifði hálfleiks. Magnús komst næst því að skora á 35. mínútu með skoti úr miðjum teignum sem fór hárfínt yfir mark heimamanna.

Í síðari hálfleik komust HK-ingar betur inn í leikinn og fengu fljótlega gott færi þegar Hörður Árnason slapp einn inn fyrir vörn Gróttu en skaut framhjá. Á 59. mínútu gerðist umdeilt atvik þegar Sölvi Davíðsson slapp einn inn fyrir vörn HK eftir góða stungusendingu. Davíð Magnússon, miðvörður HK, sá þann kost vænstan að rífa Sölva niður en hlaut aðeins að launum gult spjald frá norksa gestadómaranum Håvard Hakestad. Pétur Már tók aukaspyrnuna en skaut rétt yfir. Rétt áður en þetta gerðist varð Grótta fyrir áfalli þegar Magnús Gíslason þurfti að yfirgefa völlinn vegna meiðsla aftan í læri.

Á 63. mínútu var Sölvi aftur á ferðinni þegar hann dansaði með boltann inn í vítateig HK og náði góðu skoti í fjærhornið sem endaði með marki og Grótta komið yfir í leiknum. Eftir markið skiptu HK-ingar tveimur ungum og sprækum leikmönnum inn á náðu vopnum sínum í kjölfarið. Þeir settu nokkra pressu á Gróttuliðið og voru oft nálægt því að komast í ákjósanleg marktækifæri. Fyrir vikið náði Grótta góðum skyndisóknum en oft vantaði aðeins herslumuninn að koma boltanum í netið.

Pressa HK-inga bar árangur þegar þeir fengu dæmt víti á 85. mínútu eftir barning í teignum. Jónas Grani tók spyrnuna og skoraði örugglega fram hjá Stjána í markinu. Bæði lið fengu tækifæri til að tryggja sér sigurinn undir lokin. Á 90. mínútu varði Ögmundur Ólafsson af stuttu færi frá Pétri Má en hann hafði þá snúið af sér þrjá varnarmenn HK inni í teignum. Á lokaandartökum leiksins skall hurð nærri hælum hjá Gróttuliðinu þegar Axel Birgisson komst einn á móti marki en skaut, til allrar hamingju fyrir okkur, fram hjá markinu.

2-2 jafntefli því niðurstaðan þar sem bæði lið hefðu getað náð í stigin þrjú. Gróttuliðið var þó að spila betur stærstan hluta leiksins og á köflum var leikur liðsins frábær. Sölvi, Magnús og Pétur voru baneitraðir í fremstu víglínu en sá síðastnefndi var líklega að spila sinn besta leik í sumar. Ólafur Páll og Bragi voru öflugir inni á miðjunni með Dan fyrir framan sig og svo átti Einar Bjarni marga hættulega spretti um vinstri vænginn.

Næsti leikur Gróttu er laugardaginn 7. ágúst þegar Fjarðabyggð kemur í heimsókn á Gróttuvöll. Þetta verður sex stiga leikur af dýrari gerðinni en Austfirðingar eru einu sæti og tveimur stigum á eftir Gróttu í 1. deildinni.

Lið Gróttu í leiknum:

Kristján Finnbogason, Hrafn Jónsson, Bjarni Jakob Gunnarsson, Einar Bjarni Ómarsson (Grétar Ali Khan '76), Guðmundur Bragi Árnason, Ólafur Páll Johnson, Dan Howell, Sölvi Davíðsson, Pétur Már Harðarson, Magnús Bernhard Gíslason (Elvar Freyr Arnþórsson '54)

Ónotaðir varamenn: Kjartan Ólafsson, Ásgrímur Sigurðsson, Hafsteinn Bjarnason

Til baka, Senda grein, Prenta greinina