Grótta á Eyrogym í júlí

Fimleikadeild

26.6.2010

Fimleikasamband Íslands tekur þátt í sýningahátíð fimleikasambands Evrópu (UEG), EUROGYM sem haldin verður í Odense 10.-16.júlí 2010. EUROGYM er haldin á tveggja ára fresti og er þetta í fjórða skipti sem Ísland tekur þátt. EUROGYM er sýningahátíð fyrir 12 ára og eldri. Þar er blandað saman sýningum og æfingum, fræðslu og skemmtun.

Fyrir hádegi alla daga eru ýmiss námskeið. Íslensku þátttakendur ætla að æfa ýmislegt tengt fimleikum, sirkus, dans, cross fit, bogfimi, sipp, parkour og “BIG splash” þar sem hoppað er af stóru trampolíni út í vatn og reynt að mynda sem stærstan skellinn!

Eftir hádegi eru sýningar hópanna á torgum úti, inni í görðum eða verslunarmiðstöðum. Á kvöldin eru sett upp garðpartý, tónleikar, galasýningar o.fl. til skemmtunar.

Einn hópur frá hverju landi hefur síðan verið valinn til að sýna á Galasýningu UEG. Nú eru það stúlkur frá Gerplu, Akranesi og Ármanni sem sýna undir stjórn Björk Óðinsdóttur, Karenu Sif Viktorsdóttir og Tönju Kristínar Leifsdóttur.

Í ár eru tæplega 4000 skráðir þátttakendur frá 25 þjóðum. Fimleikasambandið fer nú með stærsta hóp sem nokkru sinni hefur farið á okkar vegum eða 268 manns. Þau koma frá Ármanni, Björk, Gróttu, Gerplu, Keflavík, Akranesi, Rán í Vestmannaeyjum, Þór í Þorlákshöfn og Selfossi. Saman ætlum við að skemmta okkur og vonandi öðrum við fimleikasýningar,- skrúðgöngur og samveru.

Í gær, 24.júní var haldin generalprufa hópanna þar sem foreldrum var boðið að sjá þær sýningar sem hóparnir koma til með að sýna á torgum Odense eftir tvær vikur. Í tilefni dagsins voru auðvitað teknar myndir.





Fréttir og upplýsingar má fá á heimasíðu hátíðarinnar www.eurogym2010.com

Eins á www.facebook.com/eurogympage og www.fimleikasamband.is .

Til baka, Senda grein, Prenta greinina