Gunnar Gísla: Eigum að vera stolt af því að vera Gróttufólk

18.6.2010

Gunnar Gíslason hefur verið formaður Gróttu frá árinu 2007. Í tilefni af 17. júní, þjóðhátíðardegi Íslendinga, hafði heimasíðan samband við formanninn og ræddi við hann um Gróttu og fótboltasumarið sem nú er í fullum gangi hjá öllum flokkum. Gunni spáir í spilin fyrir leik laugardagsins og telur Gróttuliðið eiga góða möguleika svo lengi sem strákarnir mæti dýrvitlausir til leiks og berjist hver fyrir annan.

Nú er sumarið farið almennilega af stað hjá öllum flokkum Gróttu og mikið um að vera. Hvernig leggst þetta sumar í formanninn?

Sumarið legst ágætlega í mig. Reikna með erfiðu sumri í 1. deildinni enda eru mörg gömul stórveldi í þessari deild á meðan við erum að byggja okkar upp. Þurfum bara að fara að vinna fyrsta heimaleikinn í deildinni og veit að hann kemur núna í næsta leik á móti Þór.

Þú tókst við sem formaður Gróttu árið 2007 en mikið vatn hefur runnið til sjávar á þeim tíma - bæði hjá meistaraflokki og yngri flokkunum. Ertu sáttur með það starf sem hefur verið unnið og þær breytingar sem hafa átt sér stað síðustu þrjú árin?

Ég er mjög sáttur við það starf sem hefur verið unnið í félaginu síðustu ár, bæði innan aðalstjórnar og deilda félaganna. Eitt af okkar markmiðum þegar ég kom inní starfið var að auka virkni foreldra í starfinu og tel ég það hafa tekist vel þar sem það eru starfandi foreldraráð í öllum flokkum og deildum Gróttu í dag. Félagið er með mjög virka foreldra og stuðningsmenn sem er ekki sjálfgefið og fyrir það erum við þakklát í Gróttu. Félagið verður aldrei sterkara en þeir einstaklingar sem það mynda. 
 
Unnið hefur verið mikið í innra starfi síðustu ár, búið að setja upp þessa frábæru heimasíðu, ráðinn íþróttafulltrúi til félagsins, félagið búið að fá endurnýjun á fyrirmyndarfélagi ÍSÍ, stefnumótun félagsins hefur litið dagsins ljós og margt annað hefur áunnist á síðustu árum og mun vinnast á næstu árum með áframhaldandi góðu sjálfboðastarfi innan félagsins og mjög góðum stuðningi frá bæjaryfirvöldum.

 

Samkvæmt skipulagi Seltjarnarnesbæjar á að byggja þak á stúkuna við gervigrasvöllinn. Eins hefur mikið verið rætt um að gera Valhúsahæðina upp að einhverju leyti svo þar verði hægt að æfa á sumrin. Hvernig standa þessi mál?

Þessi mál eru í vinnslu en hefur seinkað, Valhúsahæðin er í forgangi og hún á að komast í gang til æfinga í sumar miðað við hvað ÍTS hefur sagt okkur hér í Gróttu. Þakið á stúkuna mun koma í náinni framtíð og bara spurning um hvaða verk á að vinna af hálfu bæjarins næstu árin.. 

 

Nú hefur knattspyrnudeild Gróttu aldrei verið stærri - erum við ekki að sjá fram á fjörugt sumar hjá öllum þeim krökkum sem æfa fótbolta hjá félaginu?

Það er búið að vera mikill uppgangur í öllum deildum Gróttu undanfarin ár og fótboltinn er þar ekki undanskilin og sérstaklega eftir að vallarhúsið og þessi frábæra aðstaða við Suðurstrandarvöll var tilbúin. Það verður mikið um að vera á vellinum í sumar og því brýnna en ella að klára Valhúsahæðina. Gaman að sjá að kvennaboltinn er að vaxa og dafna innan Gróttu.

Þetta sumar á eftir að verða fjörugt, yngstu iðkendurnir eru að fara á mótið á Skaganum, svo Eyjar og Akureyri.  Þetta er bara eins og heimsmeistarakeppni fyrir þessa krakka, hef farið sjálfur með mína stráka á alla þessa staði og er á leiðinni á N1 mótið á Akureyri - alltaf jafn gaman.  Svo fara eldri flokkarnir erlendis í sumar þannig að það getur bara ekki annað en verið skemmtilegt sumar í vændum hjá yngri iðkendum og vonandi kemst meistaraflokkurinn á skrið í deildinni og fer að hala inn fleiri stig.

 

Er þjóðsagan um að það séu bara "bómullarbörn" í Gróttu sönn?

Reikna með að þú sért að vitna í hugtak sem ég lét falla á góðum þjálfarafundi á sínum tíma!  Að mínu mati eru "bómullarbörn" í Gróttu og svo er spurningin hvernig fólk túlkar þetta orð. 

Ég sjálfur æfði og spilaði með KR upp alla mína yngri flokka bæði í handbolta og fótbolta þó svo ég sé uppalinn á Nesinu.  Var í frábærum árgangi í KR (1969) og á þeim bænum unnum við allt og eini árgangurinn sem hefur orðið Íslandsmeistari sex sinnum í fótbolta, frá 5 flokk og í gegnum 2 flokk.  Þetta met verður aldrei slegið í íslenskri knattspyrnusögu :).  Í þessum hópi voru t.d. nokkrir strákar af Nesinu sem hlupu, hjóluðu eða tóku strætó á æfingar og nokkrir strákar úr Breiðholtinu sem tóku alltaf strætó á æfingar í vesturbæinn 13 ára gamlir. Það var ekki verið að skutla öllum á æfingar eins og gert er á Nesinu þó um mun styttri fjarlægðir sé að ræða.
Veit ekki hvort maður eigi nokkuð að reyna að útskýra þetta hugtak nánar!
 
Þeir sem eru að spila og æfa fyrir Gróttu eiga að gera það af fullum krafti, mæta á allar æfingar og leiki til að vinna.  Hætta að hugsa um hina. Við eigum að  fara að ala upp sigurvegara í Gróttu.  Eigum að vera stolt af því að vera Gróttufólk og eigum alltaf að stefna á sigur frá því við byrjum að æfa. Það vilja allir ná árangri í öllu sem við gerum hvort sem það er í skólanum, vinnunni, lífinu og því ekki íþróttunum? 

 

            

"Félagið verður aldrei sterkara en þeir einstaklingar sem það mynda"

 

Meistaraflokknum hefur gengið upp og ofan það sem af er sumri og situr í fallsæti eins og staðan er eftir 6 umferðir. Telur þú liðið eiga meira inni eða er þetta það sem koma skal í sumar?

Hef séð heimaleikina og finnst að þeir hafi bara spilað ágætlega bara í einum hálfleik, það er fyrri hálfleikurinn á móti HK. Miðað við fjölda í hóp og það sem maður heyrði af undirbúningi liðsins í vor þá tel ég að liðið eigi töluvert mikið inni en þetta mun verða barátta alveg fram á síðustu mínútu í síðasta leik að halda sæti sínu í deildinni sem ég myndi telja yrði mjög gott sem nýliði í deildinni.

 

Hverjir eru helstu styrkleikar liðsins að þínum mati?

Erfitt að meta styrkleikana þar sem maður þekkir ekki alla þessa nýju kappa. Finnst Hrafn hafi staðið sig mjög vel í bakverðinum, Stjáni hefur líka verið öflugur í markinu. Styrkur liðsins ætti að liggja í baráttunni fyrir hvern annann.  Hef fundist það vanta í leikina í sumar, vantar meiri baráttu og ákveðni þegar menn eru með boltann og eins upp við mark andstæðinganna.
 
Svo er spurning hvort Sigurvin sé helsti styrkleikinn eða veikleiki í liðinu þar sem hann getur ekki verið með á fullum krafti vegna vinnu sinnar og barneigna.  Þegar hann er með af fullum krafti er hann einn helsti styrkleiki liðsins og leikmaður sem okkur vantar. Hann þarf bara að geta gefið sig allan í þetta, eitt sumarið í viðbót og skora ég hér með á Venna að einbeita sér að boltanum i sumar og senda alla í sumarfrí á lögfræðistofunni :)

 

Á laugardaginn á Grótta heimaleik við Þór Akureyri. Hverjir eru möguleikar liðsins þeim leik?

Eins og ég nefni hér að ofan þá veit ég að fyrsti heimasigurinn mun líta dagsins ljós á laugardaginn. Við vinnum þennan leik 3-1. Veit að liðið getur unnið öll þessi lið í deildinni nú þarf bara hópurinn að þjappa sér saman og mæta dýrvitlausir í leikinn og vinni hann sem lið.

 

Ertu sáttur með mætinguna á völlinn í sumar og stuðninginn við liðið eða getur Gróttufólkið gert betur?

Mætingin er góð en ekkert heyrist í fólkinu, á tímabili er eins og maður sé í frænku kaffi þar sem allir eru að spjalla en enginn að hvetja. Það þarf bara að virkja stúkuna á laugardaginn og sýna leikmönnum að það sé líf í stúkunni. Mæta með trommur og lúðra og styðja liðið. Ég ætla allavega að öskra.
Skora hér með á klapplið Gróttu í handboltanum að fjölmenna á leikinn, og öskra sig hás.

 

Eitthvað að lokum?

Framtíðin er björt í Gróttu og allar deildir eru að standa sig vel. Bærinn styður félagið mjög vel ásamt Íslandsbanka og allar forsendur eru hér á Nesinu til að ná góðum árangri bæði innan sem utan vallar á næstu árum.
 
Áfram Grótta!

 

 

 

"Það er skemmtilegt sumar í vændum hjá öllum iðkendum Gróttu"

Til baka, Senda grein, Prenta greinina