4. flokkur kvenna nældi í brons á Pæjumótinu

4. flokkur kvenna er elsti hópurinn sem tekur þátt á Pæjumótinu og er leikið í 7-manna bolta. Nokkrum dögum fyrir mótið skráðu þrjú lið sig úr keppni svo að eftir stóðu einungis fjögur lið, Grótta, HK, KS/Leiftur og KS/Leifur 2 (3. flokkur félagsins) Leikin var þreföld umferð á þessum þremur dögur svo allir léku við alla í þrígang.

Gróttustelpurnar hófu leik fyrsta daginn á móti sterku liði HK. Sá leikur tapaðist 4-1 en það var Birna sem skoraði mark Gróttu úr langskoti. Næst var leikið við heimastúlkur í KS/Leiftri og tapaðist sá leikur naumlega 2-1. Aftur var Birna á skotskónum og nú eftir frábæran undirbúning frá Bryndísi. Síðasti leikur dagsins var við KS/Leifur 2 og gerðu Gróttustelpurnar sér lítið fyrir og sigruðu 3. flokks stelpurnar frá Siglufirði í frábærum leik. Tinna og Hrafnhildur skoruðu mörk Gróttu en mark þeirrar síðarnefndu var einkar glæsilegt baráttumark. Um kvöldið var svo mikið fjör á torginu í miðbæ Siglufjarðar þegar sjálfur Ingó steig á stokk og spilaði nokkur lög.

 

Annar leikdagur hófst á einum besta leik mótsins hjá stelpunum gegn liði HK. Þrátt fyrir að leikurinn hafi tapast 1-0 sýndu Gróttustelpurnar gríðarlega baráttu allan leikinn og voru grátlega nálægt því að jafna metin í lokin á móti sterku liði HK sem fyrir rest fagnaði sigri á mótinu. Því miður töpuðust báðir leikir dagsins á móti Siglufjarðarstúlkunum en í seinni leiknum ber helst að minnast á frammistöðu Jórunnar og Hrafnhildar í markinu. Ekki var skemmtidagskráin þetta kvöldið af verri endanum en Eurovisionstjörnurnar Jóhanna Guðrún og Jogvan tróðu upp við mikinn fögnuð viðstaddra.

 

Á sunnudeginum kláraðist mótið með þremur leikjum. Leikirnir við HK og KS/Leifur 2 töpuðust báðir stórt en leikurinn við KS/Leifur 1 var hnífjafn og spennandi. Gróttustúlkurnar tóku forystu snemma í leiknum með laglegu marki Bryndísar. Í seinni hálfleik seig á ógæfuhliðina og endaði leikurinn 2-1 heimastúlkum í vil. Helga Vala var að spila virkilega vel á miðjunni og eins var Klara óheppin að skora ekki eftir mikla baráttu í framlínunni.

 

3. sætið því niðurstaðan en ásamt því hlutu stelpurnar háttvísiverðlaun mótsins fyrir prúðmannlega framkomu innan vallar sem utan. Þrátt fyrir að úrslitin hafi ekki alltaf dottið réttu megin átti Gróttuliðið marga góða spretti á mótinu. Arnrún og Karen áttu marga góða leiki í vörninni og eins voru þær Lovísa og Helga Vala baráttuglaðar í vörn og sókn.

 

Stelpurnar í 4. flokki eiga einn leik eftir á Íslandsmótinu á móti Fylki og fer leikurinn fram á Gróttuvelli á morgun, föstudag, kl. 19:00. Hvetjum að sjálfsögðu sem flesta til að leggja leið sína á völlinn og styðja þessar efnilegu fótboltastelpur til sigurs!