4. flokkur karla í úrslitakeppni Íslandsmótsins

29.8.2010

Á fimmtudaginn lauk leik í riðlakeppni Íslandsmóts 4. flokks karla í fótbolta. Þriðja árið í röð lék Grótta í A-riðli og náði A-lið flokksins þeim frábæra árangri að tryggja sér sæti í úrslitakeppninni með því að enda í 3. sæti riðilsins. Strákarnir kláruðu sumarið með sjö sigra, eitt jafntefli og þrjú töp en 2-1 sigur á FH í síðasta leik tryggði þriðja sætið. B- og C-liðið áttu einnig gott sumar en í fréttinni rennum við yfir sumarið hjá öllum liðum.

Í frétt síðunnar 12. júlí síðastliðinn www.grottasport.is/knattspyrnudeild/frettir/nr/2028 var farið yfir fyrstu leiki sumarisins svo hér verður einblínt á seinni hluta mótsins.

A-lið

Eins og áður sagði endaði A-liðið með 22 stig í 3. sæti A-riðils. Einn mikilvægast leikur sumarsins var við Stjörnuna 14. júlí en það var síðasti leikur fyrir Norway Cup ferðina. Gróttuliðið byrjaði betur og Davíð Fannar kom Gróttu yfir með þrumuskoti fyrir utan teig. Stjörnumenn sóttu í sig veðrið og náðu að skora tvö mörk sitt hvoru megin við hálfleikinn og voru með pálmann í höndunum þegar lítið var eftir af leiknum. Þá sýndu Gróttustrákarnir magnaðan karakter, komu sterkir til baka og jöfnuðu leikinn með góðu marki Arnórs Guðjónssonar.

Aðeins tveimur dögum eftir Norway Cup var leikið við Fjölni. Óhætt er að segja að sá leikur hafi verið vonbrigði sumarsins en hann endaði með 1-0 tapi eftir að Gróttudrengirnir áttu óteljandi færi til að komast yfir. Nokkrum dögum seinna var leikið við Aftureldingu í Mosfellsbæ og náðu strákarnir að komast aftur í gang með 3-1 sigri. Axel Fannar átti stórleik og skoraði tvö mörk á meðan Pétur Steinn skoraði eitt. Næst síðasti leikur sumarsins var við ósigrað lið Breiðabliks. Sá leikur tapaðist 6-2 en eftir 15 mínútna leik komst Grótta yfir með góðu marki. Við það datt leikur liðsins algjörlega niður og Breiðablik sigraði örugglega.

Eftir hagstæð úrslit í öðrum leikjum var ljóst að sigur á móti FH í síðasta leik dyggði til að ná takmarkinu og komast í úrslitakeppnina. Gróttustrákarnir mættu vel stemmdir til leiks og náði Þorgeir Bjarki að skora eftir aðeins fjórar mínútur. Áður en flautað var til hálfleiks náðu heimamenn að jafna og því jafnt á öllum tölum í leikhléi. Snemma í síðari hálfleik náði Þorgeir að skora annað mark, nú eftir gullfallega sendingu frá Bessa. FH-ingar pressuðu Gróttustrákana hressilega áður en yfir lauk en með þá Hjalta og Dodda fremsta í flokki hélt vörnin velli og mikil fagnaðarlæti brutust út í Kaplakrika þegar dómari leiksins flautaði leikinn af.

      

B-lið

Það gekk mikið á í leik B-liðsins við Stjörnuna en líkt og hjá A-liðinu var leikurinn mikilvægur í topppbaráttunni. Liðin skiptust á að skora tvö mörk hvort til að byrja með en rétt fyrir hálfleik gerði Stjörnuliðið út af við Gróttustrákana með þremur mörkum. Enduðu leikar 4-7 fyrir gestina í miklum markaleik. Leikurinn við Fjölni var ekki ósvipaður. Þar komust Fjölnismenn í 6-3 þegar korter var eftir en þá hafði Teddi skorað öll mörk Gróttu af vinstri kantinum. Í þetta skiptið sýndu Gróttastrákarnir ótrúlegan karakter og skoruðu þrjú mörk á lokasekúntunum og náðu að jafna 6-6 í öðrum rosalegum leik. Pétur Steinn skoraði eitt mark og varamaður Axel Ingi var betri en enginn og skoraði tvö mörk.

Leiknum við Aftureldingu í Mosfellsbæ vilja strákarnir í B-liðinu sennilega gleyma sem allra fyrst. Til að byrja með virtust Gróttustrákarnir vera með tögl og haldir í leiknum og höfðu 2-1 yfir þegar lítið var eftir en Fannari Frey og Degi hafði þá tekist að skora. Þá gerði einbeitingarleysi í vörninni vart við sig og náðu Mosfellingar að luma inn tveimur mörkum með stuttu millibili. Gróttuliðið náði ekki að koma til baka og töpuðu 3-2 í leik þar sem þeir voru mikið betra liðið. Gróttudrengir áttu litla möguleika á móti sterku liðið Breiðabliks og endaði sá leikur 6-1. Seinni hálfleikurinn var mun betri og endaði 1-1 þar sem Axel Ingi skoraði mark Gróttu eftir góða sókn.

Í síðasta leiknum við FH voru strákarni í B-liðinu staðráðnir í að ljúka sumrinu með stæl og það gerðu þeir svo sannarlega. Spiluðu eins og kóngar allan leikinn og skoruðu fimm gullfalleg mörk og áttu margar fleiri glæsilega sóknir. Axel Ingi skoraði þrennu á meðan Teddi og Dagur settu hin tvö. Fyrirliðinn Siggi Egils átti stórleik á miðjunni og vörnin með Ara, Friðrik, Sigga Örn, Viktor Orri og Stulla í markinu var einnig frábær. Góður endur á sumrinu hjá B-liðinu sem endaði í 5. sæti með 19 stig eftir marka flotta leiki í A-riðlinum.

           

C-lið

Síðasti leikur C-liðsins fyrir Norway Cup var við Fjölni2 og í annað sinn í sumar náðu strákarnir að vinna Grafarvogsdrengina, nú 8-0. Bessi Gautur skoraði þrennu, Viktor Freyr tvö mörk, Trausti eitt mark, Ásgeir Tómas eitt og Kristófer Scheving eitt mark en hann er á yngra ári í 5. flokki. 12. ágúst öttu strákarnir kappi við Breiðablik í hörkuleik sem endaði vel með 3-2 sigri Gróttustrákanna þar sem allt liðið var að spila vel og liðsheildin afar góð. 

Næst var komið að leik við FH-inga í Hafnarfirði. Þar vann C-liðið sinn þriðja sigur í röð, nú 5-2 en liðið spilaði sérstaklega vel í seinni hálfleiknum. Kristófer Orri, leikmaður 5. flokks, skoraði fjögur mörk og Viktor Freyr eitt. Markvörðurinn Einar Gylfi batt vörnina saman með góðum leik en hann getur leikandi brugðið sér í stöðu miðvarðar sé því að skipta. Næst síðasti leikur sumarsins var við Fjölni1 og var leikið í hífandi roki á gervigrasvellinum við Egilshöll. Sá leikur tapaðist því miður 3-2 eftir að Gróttuliðið hafði pálmann í höndunum um miðjan seinni hálfleikinn. Liðið var þó að spila ágætlega en Aron Dagur átti sérstaklega góðan leik á miðri miðjunni.

Síðasta rimma sumarsins hjá C-liðinu var við Fylki en hann var leikinn á sjálfan Gróttudaginn og var síðasti dagskrárliður dagsins. Fyrir leikinn gengu liðin inn á völlinn og voru kynnt til leiks eins og gert er í meistaraflokksleikjum. Skemmst er frá því að segja að Gróttustrákarnir höfðu 2-1 sigur í stórskemmtilegum leik. Björn Andri skoraði fyrsta markið í fyrri hálfleik eftir frábæra sókn þar sem boltinn gekk hratt manna á milli. Í síðari hálfleik var það enginn annar en Ásgeir Tómas sem skoraði annað markið og það með miklum þrumufleyg uppí skeytin fjær. Fylkismenn komust betur inn í leikinn undir lokin og náðu að minnka muninn. Rétt áður en flautað var til leiksloka komst sóknarmaður Fylkis einn inn fyrir Gróttuvörnina en Einar Gylfi bjargaði með heimsklassamarkvörslu. Kjartan og Siggi Sæm áttu mjög góðan leik í vörninni en Styrmir var einnig sprækur á miðjunni. C-liðið endaði í 3. sæti A-riðils með 22 stig.

         

 

Eftirminnilegu sumri lokið hjá B- og C-liðinu en A-liðið keppir um næstu helgi í úrslitakeppni Íslandsmótsins. Þar verða mótherjarnir Breiðablik, Víkingur og Fjölnir og verður leikið á heimavöllum liðanna. Stigahæsta liðið úr viðureignunum leikur síðan hreinan úrslitaleik um Íslandsmeistaratitilinn að tveimur vikum liðnum við KA, Keflavík eða Fjarðabyggð.

 

 

Til baka, Senda grein, Prenta greinina