Gróttupæjur á Pæjumóti í Eyjum - Ferðasaga
Það voru eldhressar Gróttupæjur sem stukku um borð í Herjólf síðdegis miðvikudaginn 13. júní. Ferðinni var heitið til Vestmannaeyja á Pæjumót þar sem rúmlega 400 fótboltastelpur í 5. flokki komu saman og spiluðu í 3 heila daga. Grótta sendi A- og B-lið til leiks sem er mikill dugnaður fyrir ekki stærri hóp en nokkur félög slepptu því að skrá A- eða B-lið. Ferðin var mikið ævintýri í frábæru veðri og er stemningin innan Gróttuhópsins umtöluð. Nánari ferðasögu má lesa hér að neðan.
Eins og áður sagði var haldið til Vestmannaeyja seinni partinn á miðvikudeginum og þegar til Eyja var komið keyrði rúta hópinn upp í Hamarsskóla þar sem stelpurnar komu sér fyrir. Nokkrir foreldrar slógu upp tjaldborg á besta stað á tjaldsvæðinu þar sem nestisbirgðir hópsins voru geymdar en tjaldborgin varð nokkurs konar samkomustaður milli leikja.
Fjörið hófst svo fyrir alvöru á fimmtudagsmorgun en bæði lið hófu keppni kl. 08:20 að staðartíma. Anna Björk þjálfari stelpnanna var í miðju inntökuprófi og komst því ekki fyrr en um kvöldið svo þjálfarinn góðkunni Magnús Örn Helgason var mættur á svæðið og hljóp í skarðið fyrir Önnu. B-liðið sigraði HK í fyrsta leik með glæsibrag þar sem Anja setti tvö á meðan A-liðið tapaði 2-0 fyrir Keflavík eftir hetjulega baráttu. Stelpurnar voru ánægðar með sitt framlag en leik liðanna stuttu fyrir mót lauk með 7-0 sigri Keflavíkur.
Bæði lið léku tvo leiki til viðbótar á fimmtudeginum. Fyrri hálfleikur A-liðsins á móti Valsstúlkum, tilvonandi sigurliði mótsins, var stórbrotinn en Gróttustelpurnar fengu fjölmörg færi til að skora á þær rauðklæddu. Valsstelpur sýndu styrk sinn í lokin og höfðu öruggan sigur en frammistaða Gróttu var til fyrirmyndar.
Um kvöldið fór fram hæfileikakeppni í íþróttahúsinu þar sem hvert félag var með söng- /dansatriði. Gróttustelpurnar slógu að sjálfsögðu í gegn með lagi Adele, "Rolling in the deep", en þær Anna Lára, Berta og Heba sungu og allur hópurinn tók þátt í dansi. Eftir keppnina fengu allir ís áður en haldið var upp í skóla og gengið til náða.
Föstudagurinn var strembinn en A-liðið tapaði 1-0 fyrir bæði HK og Selfossi í feykilega jöfnum leikjum. B-liðið tapaði fyrir Snæfellsnesi og Skallagrím en hvorugt félag var með A-lið í mótinu. Dagurinn endaði þó á jafntefli hjá báðum liðum en leikur A-liðsins við Víking var æsispennandi. Þá komust Víkingsstúlkur 2-0 yfir en Gróttuliðið sýndi gríðarlegan karakter með því að jafna með tveimur mörkum frá Bertu og munaði minnstu að Heba næði að tryggja sigur en hún skaut í slánna rétt fyrir leikslok.
Um kvöldið fór fram landsleikur á Hásteinsvelli þar sem einn fulltrúi úr hverju félagi keppti fyrir annað hvort "landsliðið" eða "pressuliðið". Þjálfarar Gróttu voru valdir til að stýra landsliðinu en þar sem Maggi var farinn í bæinn var Ísak Runólfsson Önnu Björk til aðstoðar á hliðarlínunni. Kristín Helga Jónsdóttir var glæsilegur fulltrúi Gróttu í leiknum en með hana innanborðs og Önnu og Ísak á hliðarlínunni hafði landsliðið 4-2 sigur í spennandi leik. Afar skemmtilegt að fylgjast með svo hæfileikaríkum stúlkum etja kappi en margar þeirra eiga klárlega framtíðina fyrir sér í boltanum.
Laugardagur runninn upp og enn skein sólin glatt. Bæði A- og B-liðin léku við ÍBV um sæti en báðir leikir töpuðust naumlega en öllum ljóst að framfarir Gróttustelpnanna á mótinu voru mjög miklar. Á lokahátíðinni voru veitt ýmis verðlaun og kom það öllum að óvart að Grótta skyldi ekki hljóta titilinn "skemmtilegasta liðið" enda fjörið endalaust hjá Gróttuhópnum. Milli leikja söfnuðust stelpurnar iðulega saman á tjaldstæðinu og oftar en ekki var dansað og sungið svo eftir var tekið. Ekki má heldur gleyma frábærum foreldrahóp sem á heiður skilinn fyrir gott og skemmtilegt starf.
Gróttupæjurnar voru margar orðnar ansi þreyttar þegar heim var komið á laugardagskvöld en með safn af góðum minningum sem munu seint gleymast. Það er fátt skemmtilegra en sumarmótin í fótboltanum, sérstaklega þegar veður er gott og foreldrahópurinn samstilltur. Krakkarnir eru í fótboltanum af lífi og sál og mótin eru ákveðin hápunktur á starfinu. Við hvetjum því alla foreldra til að fylgja börnunum sínum eftir sem lengst og skapa góðar minningar.
Ísak og Anna Björk stýra landsliðinu af ákveðni. Kristín Helga er beint fyrir framan Ísak í landsliðsbúningnum.
Ólöf og Rut á fleygiferð
Vala gefur ekkert eftir á miðjunni
Soffía varði oft ótrúlega í markinu
A-liðið
B-liðið
Glæsilegur Gróttuhópur